Ilang malalapot na kataga mula sa klase ng Pilosopiya

"Kapag nasabi na ang lahat ng masasabi, ang pinakamahalaga ay hindi pa rin nasasabi" - Fr. Roque Ferriols

"Manipis ang kataga upang ilarawan ang kakapalan ng karanasan" - Geoffrey Guevara

*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*

Malimit na nakatuon ang tao sa pagsagot sa mga tanong na humihingi ng tiyak na kasagutan (halimbawa: depinisyon). Sa ganitong mga pagkakataon, minsan ay nanlulumo tayo kapag hindi natin maapuhap ang sagot na ating ninanais. Naiinis tayo, nagagalit, naiirita, nalulungkot sa mga pagkakataong nilalagak natin ang mga sarili sa sitwasyon na sa tingin natin ay hindi natin maunawaan dahil wala tayong tiyak na kasagutang pinanghahawakan. Ngunit hindi ba mas maganda minsan na tanggapin nating hindi natin kailangang unawain (kung ang pang-unawa nga ay pagsagot sa tanong na ANO)ang lahat? Ang pag-unawa ay ating desisyon na siyang marapat na magbunga ng kaligayahan at kaganapan sa ating buhay. Kung hindi nagdudulot sa atin ng kaligayahan ang isang paghahanp, maaari tayong tumigil pansumandali at isipin kung ninanais pa ba nating ipagpatuloy ang pagsasaliksik, pagmamasid at paghahanap. O mas marapat na tayo'y tumigil na lamang sa puntong alam na natin na may alam tayo sa halip na alamin kung ano itong ating nalalaman. Minsan, sapat ng alam natin na nauunawaan natin ang mga bagay kahit na hindi natin alam kung paano patutunayan, gamit ang mga kataga, na may alam nga tayo. Minsan kasi, mas madaling umunawa at gumawa ng mga bagay sa halip na limitahan ang kaganapang nito gamit ang mga kataga. Ang mas mahalaga ay ang katotohanang kaya kong umunawa, kung ako nga ang gustong umunawa, sa kabila ng limitado kong kakayahan na patunayan sa iba na akin talagang ito nauunawaan.

*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-**-*-*-*-*-*-*

"Mas mabuting gawin muna bago alamin kung ano" - Fr. Ferriols

Mas madaling maunawaan ang mga bagay sa mundo kung itinutulak natin ang ating mga sarili na danasin ang mga ito. Gayun nga lamang, kinakailangan din ng kataga upang magbunga ng pagkilos at paggawa. Mahalaga ang mga kataga, kahit hindi ito sapat, upang magsagawa ng pagkilos at maunawaan ang mga bagay-bagay. Hindi man kayang sakupin ng mga kataga ang kabuuan ng isang bagay o ideya, ito ay isang mahalagang instrumento ng umuunawa upang makaunawa. Sa bawat pagnanais na kumilos, may mga katagang ibinubuga ang mga labi upang sindihan ang ating karanasan at maunawaan ang paggawa matapos magdesisyon na isagawa ang naunawaan.